[影片] 西貢車震熱點驚現警告牌 嚇鬼！

本港最近又發生非法「公眾娛樂」事故，八方近日揸車深入西貢清水灣半島兜風，九曲十三彎之後去到小棕林泳灘，意外發現一個「嚴禁車震」告示牌。該處位置偏僻陰森，雜草叢生，咁嘅環境，難怪成為自駕遊「性」地。

逢周二或四有人搞搞震
個告示牌好大個，圖文並茂中英俱備，寫埋「 No Dogging」，以免老外唔識睇。 Dogging嘅意思係，喺半公開場所發生性行為，可以喺山頭，可以喺交通工具，車震只係 Dogging嘅其中一個種類。外國不時有 Dogging Party。
講番個告示牌，上面仲寫有四句警世句子：「祖先墳前，勿亂偷歡；鬼神共鑑，惡果自負。」言下之意，相信係有人不滿有車之士當呢度係陽台，破壞祖先山墳寧靜肅穆之餘，仲隨時引來鬼神鑑賞，搞到雞犬不寧。
呢塊牌位於西貢五塊田山腳嘅坑口永隆路，八方問過附近嘅帆船訓練會，職員話唔知邊個咁有創意、咁畀心機作出「溫馨提示」，佢從來冇見過車震。八方噚日再入永隆路，一對住喺附近嘅外籍男女證實，逢星期二或四晚例必有人在此車震，佢哋曾目擊激情場面，真係 OMG！呢對老外街坊又大讚「嚴禁車震」告示牌製作精美，十分 lovely，佢哋十分鍾意。



八方見唔到附近有山墳，思疑告示牌上鬼神之說可能屬警嚇性質，假如真係喺人家祖墳前履行房事，又會有乜惡果呢？八方向堪輿學家周漢明討教，周師傅嚴厲警告，指咁搞可能會俾啲邪嘢纏身行衰運。專門驅鬼嘅吳佩孚師傅進一步解釋，佢話在先人前歡好，可能激嬲先人招來報復。

可控公眾地方行為不檢
即使唔信邪，香港係法治社會，都應該守法。律師黃國桐話，車震多數唔會喺自己後花園，若然喺公眾地方，去攞娛樂牌食環署都一定唔會批，一旦被人捉到正嘅話，可以被控公眾地方行為不檢或者猥褻暴露，最嚴重可以坐監六個月。不過越犯禁嘅嘢就越刺激，自人類發明汽車以來，車震呢樣「公眾娛樂」就禁之不絕。香港其中一個車震勝地飛鵝山，據講夜晚仲旺過日頭。

資料來源：蘋果日報

提示訊息

鑑於此原因，如此訊息出現在非『發夢』©King 網站下，那此站屬未經授權下惡意複製文章的「暴徒」！！